الوقت - سعودی عرب کی جارحیت کے جواب میں یمنی فوج اور رضاکار فورس نے سعودی عرب کے جنوبی علاقے نجران میں ایک فوجی چھاؤنی کو ميزائل سے نشانہ بنایا جس میں کئی سعودی ایجنٹ ہلاک ہو گئے۔
یمن کے مرکز میں واقع صوبہ مآرب کے صرواح علاقے میں بھی سعودی عرب کے کئی ایجنٹ، یمنی فوجیوں اور رضاکار فورس کے ساتھ جھڑپوں میں ہلاک ہوئے۔
یمن کے جنوب مشرق میں واقع صوبہ شبوہ میں یمنی فوجیوں اور رضاکار فورس کے جوانوں کی کوشش سے عسيلان قصبے میں سعودی عرب کے ایجنٹوں کی دراندازی ناکام ہو گئی۔ اس کارروائی میں سعودی ایجنٹوں کی ایک فوجی گاڑی تباہ اور اس میں سوار تمام ایجنٹ ہلاک ہو گئے۔
دوسری طرف یمنی فوج کے بیلسٹک ميزائلوں نے سعودی نیشنل گارڈ کی چھاؤنی کو تباہ کرکے نجران کے فوجی اڈے کو زبردست نقصان پہنچایا ہے۔ یمن کے المسيرہ ٹی وی چینل کے مطابق، یمنی فوج نے یہ حملے رضاکار فورس کے تعاون سے کیا۔
یمنی فوج اور رضاکار فورس کے جوانوں نے صوبہ لحج میں سعودی اتحاد کے فوجیوں کے ٹھکانوں کو بھی نشانہ بنايا۔ اس حملے میں سعودی اتحاد کے درجنوں فوجی ہلاک و زخمی ہوئے ہیں۔ جنوبی مغربی سعودی عرب کے جيزان کے علاقے میں بھی سعودی اتحاد کے فوجیوں کے مرکز پر یمنی فوج اور رضاکار فورس نے شدید حملے کئے۔
در ایں اثنا شمالی یمن میں سعودی جنگی طیاروں کی بمباری میں 6 بے گناہ شہری جاں بحق ہو گئے۔
العالم ٹی وی چینل کے مطابق، جارح سعودی جنگی طیاروں نے پیر کی صبح صوبہ صعدہ کے باقم قصبے پر حملہ کیا جس میں 6 بے گناہ شہری جاں بحق ہوئے۔
سعودی جنگی طیاروں نے دارالحکومت صنعا اور جنوبی صوبہ تعز کے مختلف علاقوں پر کئی بار بمباری کی جس میں ان علاقوں کو شدید نقصان پہنچا۔
سعودی جنگی طیاروں نے اسی طرح مغربی یمن کے صوبہ الحدیدہ کے كثيب علاقے میں واقع بحری اڈے پر کئی بار بمباری کی۔
