الوقت - یمن کی عوامی تحریک انصار اللہ کے سربراہ نے کہا ہے کہ امریکہ اور اسرائیل اختلافات کو ہوا دے کر عالم اسلام پر اپنا تسلط قائم کرنے کی کوشش کر رہے ہیں۔
عید غدیر کی مناسبت پر ایک عظیم الشان اجتماع سے خطاب کرتے ہوئے انصار اللہ کے سربراہ عبدالمالک الحوثی کا کہنا تھا کہ امریکا اور اسرائیل، عالم اسلام کو اس کے اخلاقی، روحانی، ثقافتی و عقیدتی اقدار سے دور کر کے اور اختلافات پیدا کرکے عالم اسلام پر تسلط قائم کرنا چاہتے ہیں۔
انہوں نے سعودی عرب کو امریکا کا غلام قرار دیا اور کہا کہ آل سعود حکومت، عالم اسلام میں اختلافات، قتل وغارت اور جنگ کی ذمہ دار ہے اور امریکی اہداف کی تکمیل کا ذریعہ بنا ہوا ہے۔
انصار اللہ کے سربراہ نے ایک بار پھر کہا کہ یمن پر حملے کی اصل سازش امریکا نے تیار کی تھی اور سعودی عرب کی حکومت نے آنکھ بند کرکے اس پرعمل کرنا شروع کر دیا۔
انہوں نے کہا کہ سعودی عرب دنیا بھر میں اسلام اور مسلمانوں کو بدنام کرنے کے مشن پر عمل پیرا ہے اور ایک آفت کی مانند عالم اسلام کے دامن سے چپک گیا ہے۔
سید عبد ملک الحوثی نے کہا کہ یمن کے عوام غیر ملکیوں کی جارحیتوں کا ڈٹ کر مقابلہ کر رہے ہیں۔ انہوں نے زور دے کر کہا کہ غیر ملکی جارحیت کا مقابلہ کرنے کے ساتھ ہی ہمیں اقتصادی محاصرے کا بھی مقابلہ کرنا ہوگا۔
