الوقت - عراقی فوج کے جنگی طیاروں نے ملک کے شمالی علاقے میں داعش کے بم بنانے کے سب سے بڑے ٹھکانے کو تباہ کر دیا جس میں متعدد دہشت گرد مارے گئے۔
عراقی جنگی طیاروں نے بدھ کو صوبہ نینوا میں داعش کے ایک ٹھکانے کو تباہ کیا جس میں بڑی تعداد میں بم بنائے جاتے تھے۔ اس حملے میں دس دہشت گرد مارے گئے۔ اس درمیان داعش کے دہشت گردوں نے حویجہ شہر میں واقع بكارہ چھاؤنی میں بیس عراقی نوجوانوں کو آگ میں زندہ جلا دیا۔ نینوا صوبے کے ایک قبائلی سردار نائف نعيمي نے بتایا کہ داعش کے دہشت گرد حویجہ کی عورتوں کو اس گروہ میں شامل ہونے کے لئے مجبور کر رہے ہیں اور اس گروہ کی جانب سے حویجہ شہر کا محاصرہ کئے جانے کی وجہ سے اگلے چند دنوں میں اس شہر میں انسانی المیہ رونما ہو سکتا ہے۔
عراقی پارلیمنٹ میں صوبہ كركوک کے رہنما محمد تمیم نے بھی کہا کہ حویجہ کے لوگوں کے سامنے ایک انسانی المیہ ہے جو داعش کے دہشت گردوں کے ہاتھوں سامنے آئے گا کیونکہ گزشتہ صرف چار دنوں میں داعش کے ہاتھوں اس شہر کے 112 لوگ مارے جا چکے ہیں۔ انہوں نے کہا کہ داعش نے بم اور بارودی سرنگیں لگا کر لوگوں کو شہر سے فرار ہونے سے روک رکھا ہے۔
