الوقت - ہندوستان اور تھائی لینڈ نے سمندری اور دفاع کے شعبے میں تعاون بڑھانے پر اتفاق کیا ہے۔ ہندوستان کے وزیر اعظم نریندر مودی نے تھائی لینڈ کے ہم منصب پريوت چان اوچا سے جمعے کو دو طرفہ ملاقات کی۔ اجلاس میں دونوں ممالک کے درمیان دہشت گردی، سمندری سیکورٹی، دفاع اور تجارتی تعلقات کو فروغ دینے اور باہمی تعاون کو مضبوط بنانے پر بات چیت ہوئی۔
دہلی کے حیدرآباد ہاؤس میں ہوئی نشست کے بعد وزیر اعظم مودی نے کہا کہ ہندوستان تھائی لینڈ کے ساتھ دہشت گردی کے خاتمے میں قریبی تعلقات کا متمنی ہے تاکہ سیکورٹی شراکت سے ہمارے عوام کی سیکورٹی یقینی بنائی جا سکے۔ انہوں نے کہا کہ دونوں ممالک نے ہندوستان، میانمار، تھائی لینڈ سڑک منصوبے کو جلد سے جلد مکمل کرنے پر زور دیا۔ بھارت اور تھائی لینڈ سمندری پڑوسی بھی ہیں لہذا ہمارے درمیان اس شعبے میں تعاون بڑھانے پر اتفاق ہوا ۔
وزیر اعظم نریندر مودی نے کہا کہ دو طرفہ اجلاس میں دونوں ممالک نے باہمی دلچسپی کے تمام دو طرفہ معاہدوں کا جائزہ لیا۔ انہوں نے کہا کہ ہندوستان اور تھائی لینڈ کے تعلقات مشترکہ ثقافتی بنیاد پر قائم ہیں۔ ہمارے 70 سال کے سفارتی تعلقات کے موقع پر ہم اگلے سال تھائی لینڈ کے کئی ثقافتی پروگرام ہندوستان میں منعقد ہوں گے اور ہندوستان کے ثقافتی پروگرام تھائی لینڈ میں ہوں گے۔ اس کے ساتھ ہی ہم ہندوستان - تھائی لینڈ بزنس فورم کا بھی خیر مقدم کرتے ہیں۔
تھائی لینڈ کے وزیر اعظم پريوت چان اوچا نے کہا کہ دونوں ممالک کے عوام کے درمیان اچھا رابطہ ہے جس میں کبھی کوئی مسائل نہيں ہوئے ہیں۔ اس شعبے میں توسیع کے بے پناہ امکانات موجود ہیں۔ انہوں نے کہا کہ اجلاس میں وزیر اعظم مودی نے ہندوستانی تاجروں کو تھائی لینڈ میں سرمایہ کاری کرنے کے لئے حوصلہ افزائی کرنے پر رضامندی کا اظہار کیا۔ تھائی لینڈ کے وزیر اعظم پريوت چان اوچا جمعرات کو اپنے تین روزہ دورے پر ہندوستان آئے ہیں۔ وزیر اعظم چان اوچا کا ہندوستان کا یہ پہلا دورہ ہے۔ جمعے کی صبح صدارتی محل میں ان کا رسمی استقبال کیا گیا۔ اس موقع پر وزیر اعظم نریندر مودی، مرکزی وزیر خزانہ ارون جیٹلی، وزیر خارجہ سشما سوراج، دہلی کے نائب گورنر نجیب جنگ موجود تھے۔ وزیر خارجہ سشما سوراج نے بھی ان سے ملاقات کی جبکہ تھائی لینڈ کے وزیر اعظم نائب صدر حامد انصاری سے بھی ملاقات کریں گے۔
