الوقت - ترکی کے وزیر اعظم بن علی ییلدریم نے مقبوضہ بیت المقدس میں شہادت پسندانہ کاروائی کی مذمت کی تھی جس پر فلسطین کی اسلامی مزاحمتی تحریک حماس کی جانب سے شدید رد عمل سامنے آیا ہے۔
حماس نے ترک وزیر اعظم بن علی ییلدریم اور ان کے نائب محمد شیمشک کے بیت المقدس میں شہادت پسندانہ کاروائی کے بارے بارے میں موقف کی مذمت کی ہے۔
حماس کے ترجمان حازم قاسم نے الرسالہ ویب سایٹ سے گفتگو کرتے ہوئے کہا کہ فلسطینی قوم اپنی سرزمین پر جو مزاحمت کر رہی ہے وہ جائز ہے اور بین الاقوامی قوانین کے مطابق ہے۔ حازم قاسم نے کہا کہ حقیقی دہشت گردی وہ چیز ہے جو غاصب ہماری قوم کے خلاف انجام دے رہے ہیں اور وہ قتل عام بھی دہشت گردی کے زمرے میں آتا ہے جو فلسطینیوں کے خلاف انجام دیا جا رہا ہے۔
انہوں نے آخر میں تاکید کی کہ حماس، فلسطینی امنگوں کے بارے میں ترکی کی حکومت اور عوام کے مواقف اور غزہ کا محاصرہ ختم کرانے کی کوششوں کی قدردانی کرتا ہے۔ واضح رہے کہ ترکی کے وزیر اعظم بن علی ییلدریم نے اتوار کو بیت المقدس میں ہونے والی شہادت پسندانہ کاروائی کی مذمت کی تھی۔ اس کاروائی میں چار صیہونی فوجی ہلاک اور 15 دیگر زخمی ہوئے تھے۔
