الوقت - امریکا کے فلوریڈا میں فورٹ لاڈرڈیل ہالیوڈ انٹرنیشنل ہوائی اڈے پر حملہ آور نے جمعے کو دوپہر بعد فائرنگ کی جس میں پانچ افراد ہلاک جبکہ 12 افراد زخمی ہوگئے ۔
پولیس نے فوری کارروائی کرتے ہوئے ایک مشتبہ شخص کو حراست میں لیا ہے۔ حملہ آور نے کالے رنگ کی اسٹار وار والی ٹی شرٹ پہن رکھی تھی۔ حملہ آور کی ابھی شناخت نہیں ہو سکی ہے۔
ایئر پورٹ اتھارٹي نے اپنے ٹوئٹر اکاؤنٹ پر اطلاع دی ہے کہ یہ واقعہ ہوائی اڈے کے ٹرمینل -2 بیگیج حاصل کرنے والے مقام پر رونما ہوا۔ فائرنگ کے بعد وہاں افرا تفری مچ گئی۔ وہائٹ ہاؤس کے سابق پریس سکریٹری ایئر فلیچر جو اسی ایئرپورٹ پر موجود تھے انہوں نے ٹویٹ کیا کہ فائرنگ ہوتے ہی لوگ ادھر ادھر بھاگنے لگے۔
ایئر پورٹ کے حکام نے باہر سے آنے والے مسافروں کو اندر جانے سے روک دیا۔ واقعے کے وقت بڑی تعداد میں مسافر ائیرپورٹ پر موجود تھے۔ سیکورٹی ایجنسیاں حملہ آور کے بارے میں اطلاعات جمع کرنے میں مصروف ہیں۔ مذکورہ ایئر پورٹ شمالی میامی سے 25 کلومیٹر کے فاصلے پر واقع ہے۔
فورٹ لاڈرڈیل ایئرپورٹ پر ہوئی فائرنگ کے بعد سیکورٹی کے پیش نظر تمام پروازیں معطل کر دی گئی ہیں۔
