الوقت - روس نے کہا ہے کہ ایران کے جوہری پروگرام کو خطرہ بتا کر پیش کرنے کا ڈرامہ اب نہیں چلے گا۔
روس کے صدر ولاديمير پوتين نے ایران کے پرامن ایٹمی پروگرام کو مغرب بالخصوص امریکہ کی جانب سے خطرہ بنا کر پیش کئے جانے کی کارروائی کی سخت تنقید کرتے ہوئے کہا کہ وہم و گمان اور تصورات کی بنیاد پر ایٹمی پروگرام کو خطرہ بنا کر پیش کرنے کا معاملہ ختم ہو چکا ہے۔
ولاديمير پوتين نے جمعرات کو بیرون ملک تعینات روسی سفارتی مشن کے حکام اور اہلکاروں سے خطاب کرتے ہوئے کہا کہ ایران کے جوہری پروگرام کو صرف اس وجہ سے خطرہ بناكرپیش کیا جا رہا تھا تاکہ امریکہ اس بہانے یورپ میں اپنے میزائل سسٹم نصب کر سکے۔
انہوں نے کہا کہ جوہری خطرے کا ڈرامہ اب نہیں چلے گا۔ انہوں نے کہا کہ ایران کے خیالی خطرے کے ختم ہونے کے باوجود یورپی ممالک میں میزائل نصب کرنے کا کام بدستور جاری ہے۔ ان کا کہنا تھا کہ ماسکو اس معاملے میں خاموش نہیں رہے گا۔ انہوں نے مشرقی یورپ میں امریکا کی جانب سے میزائل سسٹم لگائے جانے کو افسوسناک قرار دیا اور دو ٹوک الفاظ میں كہا کہ روس اس کا مناسب اور ضروری جواب دے گا۔
ولادیمیر پوتن نے کچھ روز قبل اپنے ایک بیان میں کہا تھا کہ ہمیں اس بات کو فراموش نہیں کرنا چاہئے کہ چند سال پہلے تمام مغربی ممالک ہمارے مقابلے میں بیک آواز کہہ رہے تھے کہ مشرقی یورپ میں امریکی میزائل سسٹم کی تنصیب، ایران کے ممکنہ ایٹمی خطرات کا مقابلہ کرنے کے لئے ضروری ہے، لیکن آج تہران کی جانب سے اس قسم کا خطرہ کہاں ہے؟
