الوقت کی رپورٹ کے مطابق محکمہ انسداد دہشت گردی نے کراچی کے علاقے سہراب گوٹھ میں کارروائی کرتے ہوئے کالعدم تحریک طالبان پاکستان سجنا گروپ کے اہم کمانڈر حنیف اور اس کے ساتھی دہشتگرد کو گرفتار کرلیا جب کہ سول لائن میں کارروائی کے دوران سیاسی جماعت کے 2 ملزمان کو بھی گرفتار کیا گیا ہے۔
ایس ایس پی سی ٹی ڈی عامر فاروقی نے پریس کانفرنس میں بتایا کہ گرفتار ملزم حنیف اور اس کے ساتھی کا تعلق کالعدم تحریک طالبان سجنا گروپ سے ہے، دہشتگرد حنیف 2002 میں سجنا گروپ میں شامل ہوا اور اس نے 2006 میں قبائلی علاقے میں ایف سی کے 12 اور اسی سال ڈشکہ کے علاقے میں 6 اہلکاروں کوہلاک کیا۔ ایس ایس پی کے مطابق 2006 میں ہی کراچی آیا اور شہر میں ہونے والے قتل ، اغوا ، بھتہ خوری اور دیگر جرائم میں ملوث رہا، ملزم نے زیارت میں بھی ایف سی کے چار اہلکاروں کو شہید کیا تھا جب کہ ملزمان کے قبضے سے اسلحہ بھی برآمد ہوا ہے ۔
