الوقت کی رپورٹ کے مطابق افغان صدر اشرف غنی نے آج سنیچر کووزارت داخلہ کی نئی عمارت کی افتتاحی تقریب سے خطا ب میں کہا کہ افغانستان کے دشمن اس ملک کو دو حصوں میں تقسیم کرنا چاہتے تھے لیکن افغان افواج نے ان کی اس سازش کو ناکام بنا دیا۔ انھوں نے کہا کہ افغان افواج نے اس سازش کو ناکام بنانے کی مہم میں کافی قربانیاں دی ہیں۔
اشرف غنی نے کہا کہ ہر افغان باشندہ امن چاہتا ہے اور ہم نے نہ جنگ شروع کی ہے اور نہ ہی اس کو جاری رکھا ہے بلکہ یہ جنگ ہمارے عوام پر مسلط کی گئی ہے۔
افغانستان کے صدر محمد اشرف غنی نے علاقائی اور عالمی دہشت گردی کو مشترکہ خطرہ قرار دیا اور کہا کہ اس کو ختم کرنے کے لئے مشترکہ اور طویل جدوجہد کی ضرورت ہے۔
انھوں نے ملک میں امن و امان کے قیام کے تعلق سے افغان پولیس اور سیکورٹی فورس کی توانائی کی قدردانی کرتے ہوئے کہا کہ اگر علاقے سے دہشت گردی ختم نہ ہوئی تو دنیا میں کسی بھی ملک میں امن و سلامتی باقی نہیں رہ سکتی۔
