الوقت کی رپورٹ کے مطابق ترجمان وزارت خارجہ حسین جابر انصاری نے نائیجیریا کے صوبہ کادونا کے شہر زاریا میں گذشتہ 2 روز سے ہونے والی جھڑپوں پرافسوس کا اظہار کرتے ہوئے، کہ جس میں شیعہ مسلمانوں اور نمازیوں کی ایک بڑی تعداد شہید اور زخمی ہوگئی، دینی و مذہبی شخصیات اور مقدس مقامات کے احترام کی ضرورت پر تاکید کی ۔
انہوں نے کہا کہ اسلامی تعاون تنظیم کا ایک اہم ملک ہونے کی حیثیت سے نائیجیریا کو اس وقت انتہا پسندی اور تکفیری دہشت گردی سے وجود میں آنے والے مسائل کا سامنا ہے اور ہمیں امید ہے کہ ان حالات میں دہشت گردی سے مقابلے کے لئے قومی یکجہتی اور امن کے تحفظ کو ترجیح دی جائے گی اور عجلت پسندانہ اورغیرتعمیری اقدامات سے پرہیز کیا جائے گا۔
واضح رہے کہ نائیجیریا میں فوج نے اس ملک کے ممتاز شیعہ مذہبی رہنما آیت اللہ ابراہیم الزکزکی کے گھر پر حملہ کرکے ان کو گرفتار کرلیا اور ان کے گھر کو آگ لگا کر گھر کے کئی حصوں کو تباہ کردیا۔
فوج کے حملے میں دسیوں افراد منجملہ آیت اللہ ابراہیم الزکزکی کا بیٹا ، بیوی اور ان کے نائب شہید ہوگئے -
