الوقت کی رپورٹ کے مطابق محرم کا چاند نمودار ہوتے ہی پوری دنیا کی طرح یہاں اسلامی جمہوریہ ایران،عراق،بحرین، شام ، لبنان پاکستان اور بھارت میں بھی سید الشہدا حضرت امام حسین علیہ السلام اور ان کے اصحاب باوفا کی عظیم قربانیوں کو خراج عقیدت پیش کرنے کے لئے مجالس عزا اور نوحہ و ماتم کا آغازہوگیا ہے -
کل رات سے ہی ایران کے سبھی چھوٹے بڑے شہروں میں مجالس سید الشہدا کا سلسلہ شروع ہوگیا- پاکستان، عراق، شام ، لبنان، بحرین اور بھارت سے بھی اطلاعات ہیں کہ عاشقان اہل بیت عصمت و طہارت(ع) کے ساتھ مختلف مکاتب فکر کے لوگوں نے بھی محسن انسانیت حضرت امام حسین(ع) کی یاد میں مجالس عزا کا اہتمام شروع کردیا ہے -
عراق کے سبھی مقدس شہروں خاص طور پر کربلائے معلی میں عراق اور دنیا کے مختلف ملکوں سے عزاداروں کی بڑی تعداد پہنچنا شروع ہوگئے ہیں- اس وقت کربلائے معلی میں سوگواروں اور عزاداروں کا جم غفیر ہےجو سینہ زنی اور نوحہ خوانی اور اسی طرح اشک غم بہا کر امام زمانہ (عج) کو پرسہ پیش کر رہے ہیں۔
چودہ صدیاں گذرنے کے بعد بھی نہ صرف کربلا کے جانسوز واقعے اور حضرت امام حسین(ع) اور ان کے اصحاب کی قربانیوں کی اہمیت کم نہیں ہوئی ہے بلکہ جیسے جیسے وقت گذر رہا ہے امام عالیمقام کی قربانی اور عاشورہ کا پیغام اور زیادہ زور و شور کے ساتھ آفاقی حیثیت اختیار کرتا جارہا ہے اور امام مظلوم کے ماننے اور چاہنے والے وقت کے تکفیریوں اور یزیدیوں کا مقابلہ کر رہے ہیں۔
شاعر نے کیا خوب فرمایا ہے کہ ہر روز ہے روز عاشورا، ہر شہر ہے شہر کرب وبلا
