الوقت کی رپورٹ کے مطابق فرانس کے وزیر خارجہ لوران فیبیس نے کہا ہے کہ ایران اور پانچ جمع ایک گروپ کے درمیان ایٹمی مذاکرات میں کافی پیشرفت ہوئی ہے تاہم کام ابھی مکمل طور پر ختم نہیں ہوا۔ انہوں نے کہا کہ ہوسکتا ہے کہ مذاکرات کا سلسلہ طے شدہ تاریخ کے بعد بھی جاری رہے۔ انہوں نے کہا کہ ایران نے پابندیوں کے خاتمے اور دیگر معاملات کے بارے میں بہت ہی واضح اور شفاف سوالات پیش کئے ہیں۔
دوسری جانب ویانا مذاکرات میں شریک چین کے نائب وزیر خارجہ لی باؤ دونگ نے کہا ہے کہ مذاکرات کار معاہدے سے محض ایک قدم کے فاصلے پر ہیں اور امکان ہے ایک ہفتے کے اندر جامع ایٹمی سمجھوتے کا حصول ممکن ہوجائے گا، اسی دوران امریکی وزیر خارجہ جان کیری نے کہا کہ ابھی یہ کہنا قبل از وقت ہوگا کہ مذاکرات نتیجہ خیز ثابت ہونگے یا نہیں۔
ادھر ایران کی ایٹمی مذاکراتی ٹیم کے پریس انچارج نے ویانا میں ہمارے نمائندے کو بتایا ہے کہ مذاکرات کار تیس جون کے بعد بھی ویانا میں رہیں گے اور جامع ایٹمی سمجھوتے کے حصول کے لئے مذاکرات کا سلسلہ جاری رہے گا۔
