الوقت - انسانی حقوق کی موقر بین الاقوامی تنظیم ’ایمنسٹی انٹر نیشنل‘ نے کہا ہے کہ تقریبا 75 ہزار پناہ گزین شام اور اردن کی سرحد کے در میانی علاقے میں پھنسے ہوئے ہیں جن میں سے سیکڑوں خوراک اور طبی امداد کی عدم فراہمی کی وجہ سے موت کا شکار ہورہے ہیں۔
جمعہ کو تنظیم کی طرف سے یہ انکشاف ایک ایسے وقت سامنے آیا ہے جب پناہ گزینوں کے بحران سے متعلق امریکہ میں 2 اعلی سطحی اجلاس ہونے جارہے ہیں۔ ایمنسٹی انٹر نیشنل نے اس سرحدی علاقے سے ایک ویڈیو بھی حاصل کیا جس میں پتھریلے اور چٹانوں والے علاقے میں خستہ حال قبریں اور وہاں موجود پناہ گزینوں کی مفلوک الحالی کو دیکھ کر بظاہر یوں لگتا ہے کہ دنیا ں انہیں فراموش کرچکی ہے۔ گزشتہ ایک سال سے بھی کم عرصے میں اس ویرانے میں پھنسے لوگوں کی تعداد چند سو سے 75 ہزار تک پہنچ چکی ہے۔ ایمنسٹی انٹر نیشنل کی عہدیدار سارا حشاش نے وائس آف امریکہ کو بتایا کہ جن لوگوں سے تنظیم نے بات کی انہوں نے یہاں شدید اضطرابی کیفیت کا تذکرہ کیا۔ ان کا کہنا تھا کہ ’’خوراک ختم ہورہی ہے، بیماریا ں پھیل رہی ہیں، کچھ لوگ قابل علاج امراض کی وجہ سے مررہے ہیں۔ اور جو سب سے زیادہ افسوس ناک بات تھی وہ یہ کہ اگر انہیں طبی سہولت دستیاب ہو پاتی تو یہ زندگیاں بچائی جا سکتی تھیں۔
شام اور اردن کی سرحدوں کے اس درمیانی علاقے کو ’برم‘ کہا جاتا ہے اور یہ گزشتہ جون کو اس وقت بند کر دیا گیا تھا جب داعش کے مشتبہ عسکریت پسندوں کے ایک کار بم حملے میں اردن کے 6 فوجی ہلاک ہو گئے تھے۔ حشاش کا کہنا تھا کہ سرحد پر اضافی سکیورٹی قابل فہم ہے لیکن اردن کے حکام کو انسانی حقوق کے قوانین کا بھی پاس کرنا چاہیے۔ انہوں نے مزید کہا کہ اردن کم از کم اس علاقے میں انسانی ہمدردی کی بنیاد پر امدادی سرگرمیوں کو بحال کرے۔ گزشتہ ماہ کے اوائل میں اقوام متحدہ کے ادارے برائے خوراک نے کرینز کے ذریعے یہاں تقریبا ایک ماہ تک کا راشن اور طبی امداد فراہم کی تھی۔
اقوام متحدہ کی خصوصی ایلچی اینجلینا جولی بھی رواں ہفتے کے اوائل میں اردن کے دورے کے موقع پر ان پناہ گزینوں کی صورتحال کو اجاگر کرچکی ہیں۔ ایمنسٹی انٹر نیشنل نے بین الاقوامی برادری پر زور دیا ہے کہ وہ اس بحران سے نمٹنے کیلئے آئندہ ہفتے ہونے والے اجلاس میں مشترکہ طور پر بات کرے۔ پیر کو اقوام متحدہ کی جنرل اسمبلی میں پناہ گزینوں کے معاملے پر بات ہوگی جب کہ منگل کو اس موضوع پر ایک کانفرنس کی میزبانی امریکی صدر براک اوبامہ کررہے ہیں۔
