الوقت - اسرائیلی فوجیوں نے ایک فلسطینی لڑکی کو گولی مار کر شہید کر دیا ہے۔
مقبوضہ مغربی کنارے کے جنوبی علاقے میں غیر قانونی اسرائیلی بستی کے دروازے کے قریب فلسطینی لڑکی کی گاڑی ایک اسٹیشن ویگن سے ٹکرا گئی تھی، جس کے بعد صیہونی فوجیوں نے اس پر گولیوں کی بوچھار کر دی۔
فائرنگ کا یہ واقعہ جمعے کی شام الخلیل شہر کے مضافاتی علاقے میں پیش آیا۔ فلسطینی وزارت صحت نے شہید ہونے والی لڑکی کی شناخت مجد خضورکے طور پر کی ہے۔ صیہونی فوجیوں نے اپنے اس وحشیانہ اقدام کے بعد بے بنیاد دعوی کیاہے کہ یہ فلسطینی خاتون انہیں اپنی کار سے کچلنا چاہتی تھی - اسرائیلی ذرائع کا کہنا ہے کہ مجد خضور کی عمر صرف 18 سال تھی۔ گزشتہ برس اکتوبر کے مہینے میں تحریک انتفاضہ قدس کے آغاز سے اب تک صیہونی فوجیوں کی جارحیت میں دوسو بیس سے زائد فلسطینی شہری شہید ہوچکےہیں - صیہونی فوجی بے بنیاد بہانوں اور دعوؤں سے اب تک دسیوں فلسطینی شہریوں کو جن میں خواتین، نوجوان اور بچے سبھی شامل ہیں شہید کرچکے ہیں-
