الوقت کی رپورٹ کے مطابق عراق کے وزیراعظم حیدر العبادی نے صوبہ دیالہ میں تکفیری دہشت گردوں کے وحشیانہ حملے پر ردعمل ظاہر کرتے ہوئے کہا کہ تکفیری دہشت گردوں کی عراق میں کوئی جگہ نہیں ہے اور دہشت گرد گروہوں کے خلاف فوج اور سیکورٹی فورسز کا آپریشن پوری طاقت کے ساتھ جاری رہے گا-
عراقی وزیراعظم نے اس بات پر زور دیا کہ دہشت گرد، اس قسم کے وحشیانہ اور غیرانسانی حملے کر کے ہرگز اپنے مقاصد حاصل نہیں کر سکیں گے اور عراقی حکومت اور فوج دہشت گردوں کو گرفتار کرنے، انھیں قرار واقعی سزا دینے اور کچلنے کے لیے کسی بھی کوشش سے دریغ نہیں کرے گی-
واضح رہے کہ صوبہ دیالہ کے علاقے خان بنی سعد میں کل ایک کار بم دھماکے میں چالیس افراد جاں بحق اور اکہتّر زخمی ہو گئے تھے- اس وحشیانہ حملے کی ذمہ داری داعش دہشت گرد گروہ نے قبول کی تھی -
