الوقت - آسٹریلیا میں ہونے والی ایک طبی تحقیق سے یہ ثابت ہوا ہے کہ روزانہ ایک سیب کھانے سے قبل از وقت موت کا خطرہ 35 فیصد تک کم ہو جاتا ہے۔
یہ دعوی ویسٹرن آسٹریلیا یونیورسٹی نے کیا ہے۔ تحقیق میں بتایا گیا ہے کہ جو لوگ روزانہ سیب کھاتے ہیں ان کی عمر بڑھنے کا امکان اس سے دور بھاگنے والوں کے مقابلے میں زیادہ ہوتا ہے۔
یہ تحقیق 70 سے 85 سال کی عمر کے افراد کے ایک گروپ پر پندرہ سال تک کیا گیا۔ اس دوران ان پر مختلف غذاﺅں کو روزمرہ میں استعمال کرنے کے اثرات کا جائزہ لیا گیا۔ تحقیق سے پتا چلا ہے کہ سیب میں فائبر اور فلیونوئڈز پائے جاتے ہیں اور وہ خلیات میں ہونے والی توڑ پھوڑ کی روک تھام کا کام کرتے ہیں۔ یہ اجزاء بیریز، ناشپاتی، اسٹرابری وغیرہ میں بھی پائے جاتے ہیں مگر سیبوں میں فلیونوئڈز کی مقدار سب سے زیادہ ہوتی ہے۔
محققین کے خیال میں سیب کھانے سے کولیسٹرول اور بلڈ پریشر کی سطح کم ہوتی ہے جبکہ کینسر کا خطرہ بھی کم ہوتا ہے، اسی طرح یہ پھل میگنیشم، پوٹاشیم اور وٹامن سی کے حصول کا بھی بہترین ذریعہ ہے۔ واضح رہے کہ گزشتہ سال آئیووا یونیورسٹی کی ایک تحقیق میں سیب کے چھلکوں اور سبز ٹماٹروں میں ایک ایسا کیمیکل دریافت کیا گیا تھا جو عمر بڑھنے کے ساتھ پٹھوں میں آنے والی تنزلی کی روک تھام کا کام کرتا ہے۔ تحقیق میں بتایا گیا ہے کہ عمر بڑھنے کے ساتھ ایک پروٹین اے ٹی ایف 4 پٹھوں یا مسلز میں کمزوری آنے لگتی ہے جس کی وجہ جینز میں آنے والی تبدیلی ہوتی ہے تاہم دو ماہ تک سیب یا سبز ٹماٹر کا استعمال اس کی روک تھام کرتا ہے ۔
