الوقت - اقوام متحدہ نے فلسطین کے مقبوضہ شہر بیت المقدس میں موجود مسلمانوں کے تمام مقدس مقامات کی اسلامی حیثیت برقرار رکھنے پر زور دیا ہے۔ میڈیا رپورٹس کے مطابق منگل کو اقوام متحدہ کے سکریٹری جنرل بان کی مون کے ترجمان اسٹیفن ڈوگریک نے امریکی شہر نیویارک میں ایک پریس کانفرنس سے خطاب کرتے ہوئے کہا کہ بیت المقدس اور وہاں کے مقدس مقامات کے بارے میں بان کی مون کا موقف واضح ہے۔
ان کے مطابق وہ تمام مقدس مقامات کو ان کے تاریخی اسٹیٹس کے مطابق محفوظ بنانے کے خواہشمند ہیں۔ اسی موقف کا اظہار ہم نے اس سے قبل بھی بارہا کیا ہے اور فریقین سے مطالبہ کیا ہے کہ وہ مذہبی مقامات کی تاریخی حیثیت اور ان کے تقدس کی حفاظت کے لئے ہر ممکن اقدام کریں۔
اقوام متحدہ کی جانب سے یہ بیان صیہونی وزیر اعظم بنیامین نیتن یاہو کے اس بیان کے بعد جاری کیا گیا جس میں انہوں نے قدیمی بیت المقدس میں یہودی آثار قدیمہ کی تلاشی کے لئے کھدائی کا اعلان کیا تھا۔
القدس پریس کے مطابق اقوام متحدہ کے ترجمان نے مجوزہ کھدائی سے متعلق صحافیوں کی جانب سے پوچھے جانے والے سوالوں کا جواب بھی دیا۔ ان کے مطابق اقوام متحدہ نہیں چاہتا کہ بیت المقدس میں مقدس مقامات کی تاریخی اور مذہبی حیثیت کو نقصان پہنچے۔ اس لئے ہمارا مطالبہ ہے کہ بیت المقدس میں واقع تمام مقدس مقامات کے تحفظ کو یقینی بنایا جائے۔
خیال رہے کہ حال ہی میں صیہونی وزیراعظم نیتن یاہو نے کہا تھا کہ ہم بیت المقدس میں یہودی آثار قدیمہ کی تلاش کریں گے۔ اس سلسلے میں شہر کی کھدائی کی جائے گی۔ انہوں نے پوری یہودی قوم کو اس خطرناک منصوبے میں شامل ہونے کی بھی دعوت دی تھی۔
