الوقت - افریقی ملک ایتھوپیا کے دارالحکومت ادیس ابابا میں سیاسی قیدیوں کی جیل میں آتشزدگی سے 23 افراد ہلاک ہوگئے۔
موصولہ خبروں کے مطابق، آتشزدگی ادیس ابابا میں قائم قیلینتو کی جیل میں ہوئی جس کی سیکیورٹی انتہائی سخت ہے۔ ایتھوپیا کے مقامی میڈیا نے دعویٰ کیا کہ جیل میں آتشزدگی کے دوران فائرنگ کی آواز سنی گئی۔ حکومتی بیان میں کہا گیا تھا کہ آتشزدگی سے 21 افراد ہلاک ہوئے جبکہ دیگر 2 جیل سے فرارہونے کی کوشش میں ہلاک ہوئے۔ واقعے میں جیل کی 2 عمارتوں کو نقصان پہنچا جبکہ 9 زخمی قیدیوں اور پولیس اہلکاروں کو طبی امداد کے لئے قریبی ہسپتال اور دیگر قیدیوں کو فوری طور پر دوسری جیل میں منتقل کردیا گیا۔ حکام کے مطابق، واقعے کی تحقیقات جاری ہیں تاہم فوری طورپر جیل میں آتشزدگی کی وجہ معلوم نہیں ہوسکی۔ واضح رہے کہ ادیس ابابا کو ایک چارٹرڈ شہر اور ایک ریاست کی حیثیت حاصل ہے، یہ وہ شہر جس میں افریقی یونین کا صدر دفتر قائم ہے۔
