الوقت کی رپورٹ کے مطابق پاکستانی فوج کے شعبہ تعلقات عامہ کا کہنا ہے کہ فوجی عدالتوں نے پشاور کے آرمی پبلک اسکول اور سانحہ صفورہ چورنگی کراچی میں ملوث 7 دہشت گردوں کو سزائے موت اور ایک کو عمر قید کی سزا سنائی ہے۔ ترجمان کے مطابق دہشت گردوں کا ٹرائل آرمی ایکٹ 2015 کے تحت کیا گیا جب کہ آرمی چیف جنرل راحیل شریف نے بھی دہشت گردوں کو دی جانے والی سزاؤں کی توثیق کردی ہے۔
ترجمان پاک فوج کےمطابق سانحہ آرمی پبلک اسکول میں ملوث دہشت گردوں حضرت علی، مجیب الرحمان، الیاس یحییٰ، مولوی عبدالسلام، تاج محمد، اور عتیق الرحمان کو سزائے موت سنائی گئی ہے جب کہ سانحہ پشاور میں ہی ملوث ایک دہشت گرد کفایت اللہ کو عمر قید کی سزا سنائی گئی ہے اس کے علاوہ کراچی میں پیش آنے والے سانحہ صفورا میں ملوث دہشت گرد محمد فرحان کو بھی سزائے موت سنائی گئی ہے۔
واضح رہے کہ پشاور میں آرمی پبلک اسکول پر حملے کے نتیجے میں 125 بچے جاں بحق اور 147 افراد زخمی ہوئے تھے جب کہ سانحہ صفورا میں دہشت گردوں نے رینجرز اہلکاروں پر حملہ کیاتھا جس میں 3 رینجرز اہلکار جاں بحق ہوگئے تھے۔
