به گزارش الوقت به نقل از اسپوتنیک، ملا عبدالغنی برادر معاون نخست وزیر دولت موقت طالبان در مصاحبه با شبکه تلویزیونی الجزیره اعلام کرد که تاجیکستان در امور داخلی این کشور دخالت می‌کند.
به گزارش خبرگزاری اسپوتنیک، معاون نخست وزیر دولت موقت طالبان در این مصاحبه گفت: تاجیکستان در امور ما دخالت می‌کند؛ زیرا برای هر اقدام ما مخالفتی را بیان می کنند.
این در حالیست که تاجیکستان پیشتر هم در واکنش به اخبار مشابهی در این خصوص هر گونه مداخله در امور داخلی افغانستان را رد کرده بود.
پیش از این، امامعلی رحمان، رئیس جمهور تاجیکستان در سخنرانی خود در هفتاد و ششمین اجلاس مجمع عمومی سازمان ملل متحد در نیویورک باردیگر خواستار تشکیل یک دولت فراگیر در افغانستان شده بود.
رحمان تاکید کرد تاجیکستان در امور داخلی افغانستان دخالتی نمی‌کند اما همه طرف‌ها باید در دولت افغانستان حضور داشته باشند.
رئیس جمهور تاجیکستان در نشست نوبتی هفته پیش سازمان همکاری شانگهای در شهر دوشنبه نیز گفته بود در افغانستان باید دولتی فراگیر با مشارکت همه اقوام این کشور تشکیل شود.
از طرف دیگر، روز گذشته طالبان اعلام کرد که این گروه هزاران نیروی ویژه را به ولایت تخار افغانستان در مرز تاجیکستان اعزام کرده است.
یک سخنگوی طالبان در این رابطه اعلام کرد: «ده‌ها گروه نیروهای ویژه طالبان در تخار مستقر شده‌اند. ده‌ها هزار نیروی ویژه در آنجا مستقر شده‌اند».
به گفته وی، هدف از اعزام نیروها خنثی‌سازی تهدیدها‌ی امنیتی بوده است.
